រឿងរ៉ាវអស្ចារ្យពីបុគ្គលល្បី១០រូប បង្ហាញមូលហេតុមិនត្រូវចុះចាញ់ក្នុងឆាកជីវិត
បញ្ហា តែងកើតមានចំពោះមនុស្សគ្រប់រូប ដោយមិនសុំការអនុញ្ញាតជាមុនឡើយ ហើយអាចធ្វើឲ្យជីវិតរបស់យើងជួបការលំបាក និងពេលខ្លះកាន់តែដុនដាបខ្លាំង។ បញ្ហាខ្លះគ្រាន់តែធ្វើឲ្យយើងជួបការលំបាកបណ្ដោះអាសន្ន តែបញ្ហាខ្លះវិញ អាចធ្វើឲ្យយើងជួបការលំបាកពេញមួយជីវិតតែម្តង។ ទោះបីជាអ្នកជួបការលំបាកយ៉ាងណាក៏ដោយ អ្នកមិនត្រូវចុះចាញ់ឡើយ ហើយត្រូវតស៊ូជម្នះគ្រប់ឧបសគ្គទាំងអស់ ដើម្បីទទួលបានជីវិតល្អប្រសើរឡើងវិញ។
ជាក់ស្តែង ដូចជាបុគ្គលិកទាំង១០រូបខាងក្រោមនេះ ពួកគេអាចតស៊ូពុះពារគ្រប់ឧបសគ្គ រហូតអាចយកឈ្នះលើការលំបាកក្នុងឆាកជីវិត។
១) លោក Nick Vujicic
លោក Nick Vujicic រស់នៅដោយគ្មានដៃ និងជើង ប៉ុន្តែចិត្តដ៏អង់អាចរបស់គាត់ មិនបានបាក់ទឹកចិត្តឡើយ។ លើសពីនេះទៅទៀត គាត់បានក្លាយជាភស្តុតាងមួយបញ្ជាក់ថា អ្នកអាចក្លាយជាមនុស្សដែលសប្បាយរីករាយ ទោះជាស្ថិតក្នុងស្ថានភាពលំបាកខ្លាំងយ៉ាងណាក៏ដោយ។ គាត់លេងកីឡាវាយកូនគោល ជិះក្ដារលើទឹក ធ្វើដំណើរជុំវិញពិភពលោក ផ្តល់សុន្ទរកថាជំរុញទឹកចិត្ត និង មានកូនចំនួន ២នាក់ថែមទៀតផង។
២) លោក Bill Porter
នៅពេលដែលអ្នកមានគោលដៅមួយ ហើយមានបំណងប្រាថ្នាដើម្បីសម្រេចវា ពេលនោះទោះជាអ្នកមានជំងឺអ្វី ក៏មិនមែនជាឧបសគ្គសម្រាប់អ្នកដែរ។ ជាក់ស្តែង លោក Bill Porter កើតមានអាការៈពិការខួរក្បាល តែគាត់ចង់ធ្វើការជាអ្នកលក់។ ក្រោយមក គាត់បានសម្រេចគោលដៅរបស់ខ្លួន ដោយបានក្លាយជាអ្នកលក់ឆ្នើមបំផុតនៅអាមេរិក។
៣) លោក Evgeny Smirnov
គ្មានរឿងអ្វីអាក្រក់សម្រាប់អ្នករាំ ជាជាងការបាត់បង់សមត្ថភាពរាំនោះទេ។ តើត្រូវឲ្យអ្នកជំនាញរាំធ្វើអ្វី នៅពេលដែលបាត់បង់ជើងម្ខាង នៅក្នុងហេតុការណ៍គ្រោះថ្នាក់ចរាចរណ៍? ចំពោះលោក Evgeny Smirnov ដែលជាជើងឯករាំក្បាច់ Break Dance ជនជាតិរុស្ស៊ី នៅតែបន្តរាំដដែល បើទោះបីជាគាត់ត្រូវប្រើជើងសិប្បនិម្មិតម្ខាង និងរៀនរាំសារជាថ្មីម្តងទៀតក៏ដោយ។
៤) នាង Olesya Vladykina
នាង Olesya Vladykina អាយុ២០ឆ្នាំ បានជួបគ្រោះថ្នាក់មួយ នៅក្នុងប្រទេសថៃ បណ្តាលឲ្យបាត់បង់ដៃឆ្វេងម្ខាង និងមិត្តសម្លាញ់ម្នាក់។ ហេតុការណ៍នោះបានផ្លាស់ប្តូរជីវិតរបស់នាង ប៉ុន្តែនាងមិនបានចុះចាញ់ឡើយ។ នាងបានចូលរួមក្នុងព្រឹត្តិការណ៍ «Paralympic Games» ចំនួន២លើក ហើយប្រកួតបានលេខ១ និងបង្កើតកំណត់ត្រាពិភពលោកមួយផងដែរ។ នាងបដិសេធមិនប្រើដៃសិប្បនិម្មិតឡើយ និងធ្វើអ្វីគ្រប់យ៉ាង បានយ៉ាងល្អឥតខ្ចោះដោយដៃម្ខាង។
៥) លោក Sylvester Stallone (តួរ៉ាំបូ)
តើអ្នកគិតថាអ្នកត្រូវតែមានសម្រស់ស្រស់ស្អាត ដើម្បីក្លាយជាតារាសម្តែងដ៏អស្ចារ្យម្នាក់ឬ? បើអ្នកគិតបែបនេះមែន អ្នកពិតជាខុសហើយ។ លោក Sylvester Stallone ដែលដើរតួអង្គរ៉ាំបូ បានកើតមកជាមួយនឹងអាការៈ របួសពីកំណើត ដែលបណ្តាលឲ្យ ផ្នែកខាងក្រោមខាងឆ្វេងនៃមុខរបស់គាត់ពិការ ហើយវៀចមាត់បន្តិច និងនិយាយត្រដិតតិចតួចដោយសារតែមានបញ្ហាអណ្តាត ទៀតផង។
៦) លោក Andrea Bocelli
ភាពពិការភ្នែក គឺជាការបង្អត់មនុស្សមិនឲ្យមានសមត្ថភាព ក្នុងការមើលឃើញពិភពលោក ប៉ុន្តែមិនមែនគ្មានអារម្មណ៍ចំពោះវាឡើយ។ វាប្រហែលជាហេតុផលមួយ ដែលជួយឲ្យតារាចម្រៀងបុរាណពិការភ្នែកដ៏ពេញនិយម ជនជាតិអ៊ីតាលី គឺលោក Andrea Bocelli ចែករំលែក និងបំផុសគំនិតជាមួយទស្សនិកជន តាមរយៈបទចម្រៀងរបស់គាត់។ លោក Andrea Bocelli មានកូនចំនួន៣នាក់ ហើយបានរៀបការសាជាថ្មីម្តងទៀត កាលពីពេលថ្មីៗកន្លងទៅនេះ។ គាត់រីករាយនឹងជីវិតរបស់គាត់។ គាត់បាននិយាយថា ទោះបីជាគាត់គ្មានសមត្ថភាពដើម្បីមើលឃើញពិភពលោកដោយភ្នែកទាំងគូ តែគាត់នៅតែអាចមើលវាឃើញ ជាមួយបេះដូងរបស់គាត់។
៧) នាង Madeline Stuart
នៅពេលដែលអ្នកមានក្តីសុបិន សូម្បីតែពិការភាពក៏មិនអាចបញ្ឈប់អ្នកពីការសម្រេចវាបានដែរ។ នាង Madeline Stuart បានកើតមកជាមួយនឹងអាការៈខ្សោយបញ្ញា (Down Syndrome) តែចង់ក្លាយជាតារាម៉ូដែលដើរបង្ហាញម៉ូត។ នាងបានចាប់ផ្តើមលេងកីឡា និងសម្រកទម្ងន់រហូតដល់ទៅ ២០គីឡូក្រាម។ បន្ទាប់មកនាងបានព្យាយាមអស់រយៈពេលជាយូរ ដើម្បីក្លាយជាតារាម៉ូដែល។ ចុងក្រោយនាង Madeline បានសម្រេចក្តីសុបិនរបស់នាង ដោយបានចុះកុងត្រាជាមួយផលិតផលសំលៀកបំពាក់កីឡាសម្រាប់ស្រ្តី ម៉ាក «Manifesta»។
៨) នាង Victoria Duval
កីឡាការិនីវាយកូនបាល់អាមេរិក អាយុ២០ឆ្នាំ នាង Victoria Duval កើតមានជំងឺមហារីកកូនកណ្តុរ (Hodgkin Lymphoma) ប៉ុន្តែនាងនៅតែបន្តហ្វឹកហាត់ និងទទួលបានជោគជ័យលើការប្រកួត ដើម្បីមានឱកាសចូលរួមប្រកួតវាយកូនបាល់ធំបំផុត «Grand Slam»។
៩) នាង Chantelle Brown Young
ភាពស្រស់ស្អាតរបស់តារាម៉ូដែលស្រីម្នាក់នេះគឺពិតជាចម្លែក។ កាលនៅពីក្មេង នាង Chantelle បានដឹងថា នាងកើតមានស្បែកពពាល ស្ទើរតែពេញរាងកាយទាំងមូល។ ដោយសារតែមានរូបរាងល្អឥតខ្ចោះ និងមានមុខមាត់យ៉ាងស្រស់ស្អាត នាងបានសម្រេចចិត្តបង្វែរគុណវិបត្តិ ឲ្យក្លាយជាគុណសម្បត្តិវិញ ដោយបច្ចុប្បន្ននេះនាងគឺជាតារាម៉ូដែលដ៏ល្បីឈ្មោះម្នាក់។
១០) នាង Ksenia Bezuglova
ស្រ្តីជាម្តាយកូន២ ជនជាតិអ៊ីតាលីរូបនេះ គឺជាម្ចាស់ជ័យលាភីក្នុងការប្រកួតសម្រស់ ក្នុងចំណោមអ្នកប្រើប្រាស់រទេះរុញ។ នាងគឺជាសកម្មជនសង្គម ដែលចង់ធ្វើឲ្យបរិយាកាសសម្រាប់មនុស្សដែលប្រើប្រាស់រទេះរុញ កាន់តែមានផាសុកភាព។ នាងគឺជាមនុស្សម្នាក់ដែលសប្បាយរីករាយនឹងជីវិតរបស់នាង ហើយមានគម្រោងជាច្រើន។ គំនិត និង សុទិដ្ឋិនិយមគ្មានដែនកំណត់របស់នាង គឺជាឧទាហរណ៍ដ៏ភ្លឺស្វាងមួយដែលបញ្ជាក់ថា អ្នកអាចយកឈ្នះលើអ្វីគ្រប់យ៉ាងទាំងអស់ ៕
ប្រភពៈ news.sabay.com.kh
ស្គាល់ខ្លួនឯង ពីការអប់រំឥរិយាបថ
ឥរិយាបថ គឺបង្ហាញពី អត្ដចរិតល្អ និងអាក្រក់ លោកអ្នកគ្រប់រូបតែង ចង់ឱ្យខ្លួនឯងក្លាយជា មនុស្សដែលមាន ឥរិយាបថល្អ ស្គាល់ខ្លួនឯងច្បាស់ ចេះប្រើប្រាស់ សមត្ថភាពរបស់ខ្លួន និងអាចដោះស្រាយគ្រប់ បញ្ហាបាន។ មនុស្សគ្រប់រូបក៏ប្រាថ្នាចង់ បានអនាគត មួយដែលពោរពេញ ទៅដោយភាពជោគជ័យ ក្នុងឆាកជីវិត។ ទន្ទឹមនឹងការចង់បាននេះ ភាពជោគជ័យទាំងឡាយក៏ កើតចេញពីការ តស៊ូ ព្យាយាម និងភាពអំណត់ផងដែរ ដែលតម្រូវឱ្យមនុស្ស គ្រប់រូបចេះត្រិះរិះពិចារណា និងដោះស្រាយ គ្រប់បញ្ហាដែល កំពុងជួបប្រទះដោយវិធីមួយដែល ល្អបំផុត សម្រាប់ខ្លួនឯង និងអ្នកដទៃ។លោក សាំង សុខជា នាយកប្រតិបត្ដិនៃមជ្ឈមណ្ឌល អប់រំឥរិយាបថ បកស្រាយពីការអប់រំឥរិយាបថ តាមរយៈគេហទំព័រសុខភាពកម្ពុជា។
ការអប់រំឥរិយាបថ
ការអប់រំឥរិយាបថគឺជាការឱ្យដឹង ស្គាល់ និងយល់ច្បាស់ពីខ្លួនឯងថាខ្លួនកំពុងធ្វើអ្វី នឹងត្រូវត្រៀមធ្វើអ្វីខ្លះចំពោះខ្លួននាពេល អនាគត។ ការអប់រំឥរិយាបថនឹងធ្វើឱ្យលោកអ្នកស្គាល់ពីអតីតកាល និងអាចដោះស្រាយរឿងរ៉ាវពីអតីតកាលឱ្យជ្រះស្រឡះពីក្នុងចិត្ដ ដើម្បីកសាងខ្លួនឱ្យបានល្អនាពេលបច្ចុប្បន្ន។
ហេតុអ្វីបានជាត្រូវការអប់រំកែប្រែឥរិយាបថ?
ការអប់រំឥរិយាបថជាកត្ដាជួយធ្វើឱ្យលោកអ្នកបានទទួលការអប់រំ កាន់តែច្រើន និងទទួលបានអត្ថ ប្រយោជន៍ពីការអប់រំ ឥរិយាបថ។ ជាចាំបាច់សម្រាប់មនុស្សគួរតែ មានការអប់រំឥរិយាបថ ដើម្បីឱ្យខ្លួនឯងស្គាល់ ខ្លួនឯងកាន់តែច្បាស់ថែមទៀត។ នៅពេលដែលមនុស្សម្នាក់់ មិនទាន់យល់ច្បាស់ពីអ្វី ដែលខ្លួនឯងត្រូវការ ថាខ្លួនឯងកំពុងធ្វើអ្វី បុគ្គលម្នាក់នោះមានបញ្ហា ដ៏ស្មុគស្មាញដែលមិន អាចដោះស្រាយបាន ដោយសារតែមិនទាន់ស្គាល់ ច្បាស់ពីខ្លួនឯង និងមិនដឹងពី ដំណោះស្រាយដ៏ល្អ។ ការអប់រំឥរិយាបថ នឹងធ្វើឱ្យបុគ្គល នោះបានដឹងពីអ្វីសំខាន់ដែលខ្លួនមាន ហើយដឹងពីអ្វីដែលខ្លួន មិនដឹង ដើម្បីឱ្យលោកអ្នកបានចេះ ហើយអាចទៅធ្វើការ ទំនាក់ទំនងជា មួយអ្នកដទៃបាន។
ខ្លួនឯងគិតថាធ្វើត្រូវរហូត
មានលោកអ្នកមួយចំនួនតែងយល់ថាខ្លួនឯងត្រូវរហូត រាល់កិច្ចការអ្វីដែលបានធ្វើ ដោយមិនបានមើល ពីកំហុសខ្លួនឯង ដើម្បីធ្វើការ ស្ថាបនានោះទេ។ មនុស្សបែបនេះអាច ទទួលភាពបរាជ័យបានគ្រប់ពេលវេលា ដោយសារតែខ្លួនមើលខ្លួនឯងមិនឱ្យ គ្រប់ជ្រុង ជ្រោយ។ មនុស្សដែលមិនព្រម ទទួលយកការពិត និងប្រកែកពីកំហុស របស់ខ្លួន គឺជាមនុស្សដែល មិនឱ្យតម្លៃទៅលើ ខ្លួនឯង។ ដូច នេះលោកអ្នកត្រូវយល់ថាការទទួលស្គាល់នូវកំហុសរបស់ខ្លួនមិនត្រឹមតែ ឱ្យអ្នកដទៃសរសើរពី ទង្វើរបស់យើងនោះទេ គឺថែមទាំងធ្វើ ឱ្យលោកអ្នកក្លាយទៅជាមនុស្ស ដែលមានការទទួលខុសត្រូវខ្ពស់ និងជាមនុស្សដែលមានឥរិយាបថល្អ ថែមទៀតផង។ មួយវិញទៀត ការដែលមិនព្រមបញ្ចេញ ពីសមត្ថភាពរបស់ខ្លួននោះ គឺមិនមែនជារឿងល្អនោះទេ ផ្ទុយទៅវិញគេអាចវាយតម្លៃថា មនុស្ស ប្រភេទនេះ ប្រៀបដូចសត្វពង្រូល។ លោកអ្នកប្រាកដជាមិនចង់ឮនូវពាក្យទាំងនេះទេ លោកអ្នកត្រូវយល់ឱ្យច្បាស់ ត្រូវបង្ហាញសមត្ថភាពដែល ខ្លួនអាចធ្វើបាន បើទោះបីជាវាស្ថិតក្នុង កម្រិតណាក៏ដោយ ព្រោះសមត្ថភាពមនុស្សម្នាក់ៗ មិនអាចមានដូចគ្នា ទាំងអស់នោះទេ អ្វីដែល គេមានយើងមិនអាចមាន តែអ្វីដែលគេមិនមាន គឺយើងអាចមាន។
បញ្ហាដែលត្រូវប្រឈមមុខនៅពេលដែលមិនទាន់ស្គាល់ខ្លួនឯង
មិនមែនបានន័យថាលោកអ្នកត្រូវតែទទួល ការអប់រំឥរិយាបថ ទើបបានស្គាល់ពីខ្លួនឯងនោះទេ គឺអ្នកនោះត្រូវរៀនសូត្រ ស្គាល់ពីរ សជាតិជីវិត ហើយសំខាន់បំផុតនោះគឺបានស្គាល់ពីខ្លួនឯងយ៉ាងច្បាស់ ដើម្បីអ្នកទាំងនោះក៏ជាមនុស្សមួយរូបដែលទទួលភាព ជោគជ័យក្នុងឆាកជីវិតដែរ។ ការដែលមិនបានទទួលការអប់រំឥរិយាបថ មិនមែនមនុស្សគ្រប់គ្នាមិនអាចស្គាល់ខ្លួនឯងនោះទេ ប៉ុន្ដែអ្វីដែលជាចំណុចសំខាន់បំផុតពីការអប់រំឥរិយាបថនេះ គឺធ្វើឱ្យមនុស្សគ្រប់រូបកាន់តែជឿជាក់លើខ្លួនឯង មានទំនុកចិត្ដចំពោះខ្លួនឯងខ្ពស់ និងឱ្យតម្លៃចំពោះខ្លួនឯង។ ការអប់រំកែប្រែឥរិយាបថជា កត្ដាសំខាន់ដែលបង្ហាត់បង្ហាញ ឱ្យខ្លួនឯងស្គាល់ កាន់តែច្បាស់ ពីអត្ដចរិតរបស់ខ្លួន មនុស្សដែលស្គាល់ ខ្លួនឯងគឺងាយទទួលបានភាពជោគជ័យក្នុងឆាកជីវិត ច្រើនជាងអ្នកដែលមិនទាន់ស្គាល់ច្បាស់ពីខ្លួនឯង។ នៅពេលដែលមនុស្ស មិនទាន់ស្គាល់ខ្លួនឯងច្បាស់ មានបញ្ហាជាច្រើនដែល កើតមានដូចជាការមិន ហ៊ានបញ្ចេញ ពីសមត្ថភាពអ្វីដែលខ្លួនមាន ការប្រឈមមុខនឹងរឿងបរាជ័យ មិនអាចទទួលបានសុភមង្គល ក្នុងជីវិត ការទទួលភាពជោគជ័យ មានកម្រិតទាប អ្វីដែលសំខាន់នោះគឺ ខ្លួនឯងមិនអាចជួយខ្លួនឯងបានទេ។
សារៈប្រយោជន៍នៃការអប់រំឥរិយាបថ
ការដែលលោកអ្នកបានទទួលការអប់រំដ៏ល្អមួយ លោកអ្នកនឹងក្លាយជាមនុស្សដែលចេះប្រើប្រាស់ សមត្ថភាពខ្លួនមាន យល់ច្បាស់ ពីតម្លៃនៃជីវិត អាចដោះស្រាយរាល់បញ្ហា ទទួលបាននូវសុភមង្គលក្នុងជីវិត ចេះរៀបចំពីអនាគតខ្លួនឯង។ រាល់ទង្វើដែលបាន ប្រព្រឹត្ដសុទ្ធតែជាអំពើគប្បី ចេះបែងចែកអ្វីដែលល្អ និងអាក្រក់ ហើយអ្វីដែលសំខាន់ បំផុតនោះគឺនឹងអាចទទួលបាន ភាពជោគជ័យក្នុង ឆាកជីវិត។ ដើម្បីទទួលបានការអប់រំឥរិយាបថ មួយដ៏ល្អគឺអាចធ្វើឡើង ពីចំណេះដឹងដែលខ្លួនមាន ដោយបុគ្គលនោះចេះ បង្រៀនខ្លួនឯង បានរៀនមើលពីអ្វីៗដែល ជាអំពើល្អនៅជុំវិញខ្លួន និងបានមកពីការបង្ហាត់បន្ថែម ពីអ្នកដទៃសម្រាប់ខ្លួន។ មួយវិញទៀតការអប់រំ ឥរិយាបថ ក៏ជាប្រយោជន៍មួយសម្រាប់ សុខភាពផ្លូវចិត្ដផងដែរ ព្រោះមនុស្សអាចបាន ស្គាល់ខ្លួនឯង តស៊ូលំបាក ជាមួយបញ្ហាដែល កំពុងប្រឈមមុខ និងឱ្យតម្លៃជីវិត មិនគិតអ្វីដែលជាអំពើអគតិដូច ជាការធ្វើអត្ដឃាត ជាដើម។
ដំបូន្មានអ្នកជំនាញ
លោកអ្នកត្រូវចេះប្រើប្រាស់នូវសមត្ថភាពអ្វីដែលខ្លួនមាន បែងចែកអ្វីដែលល្អ និងអាក្រក់ឱ្យដាច់ពីគ្នា។ ជាកត្ដាសំខាន់ណាស់ ដែលយើង ម្នាក់ៗចាំបាច់ត្រូវគិតគូរឱ្យបានល្អពីឥរិយាបថ របស់់ខ្លួន ដោយសួរថាខ្ញុំស្គាល់ ខ្លួនឯងទេ។ នៅពេលដែលយើងអាច ឆ្លើយបាន និងបានស្គាល់ច្បាស់ ពីខ្លួនឯងហើយនោះ យើងនឹងក្លាយទៅជាមនុស្ស ម្នាក់ដែលមានឥរិយាបថល្អ ហើយភាព ជោគជ័យក្នុង ឆាកជីវិត នឹងទន្ទឹងរង់ចាំយើងនាថ្ងៃអនាគត៕
អត្ថបទ រក្សាសិទ្ធិដោយ www.healthcambodia.com